पोखरा, १० असोज /पोखरामा सवारी चाप बढे सर्गै पृथ्वीचोकमा लामो जाम हुन्छ । यातायात जामको अवरोधक आइल्याड प्रसासनले सोमबार राता रात हटायो । शहीद लखन थापाको शालिक रातारात हटाएपछि मगर लगायत जनजाति समुदायबाट भएको चौतर्फी बिरोधपछि सोही स्थानमा शालिक पुन निर्माण हुने भएको छ ।
नेपाल आदिवासी जनजाति महासंघ जिल्ला समन्वय परिषद्, कास्कीका अध्यक्ष धर्म गुरुङको विशेष पहलमा भएको वार्ताबाट १० बुँदे सहमति भएको छ । जिल्ला प्रशासन कार्यालय कास्की, पोखरा लेखनाथ महानगरपालिका र नेपाल मगर संघ कास्कीबीच भएको त्रिपक्षीय सहमति अनुसार मगर संघ कास्कीका अध्यक्ष पूर्णबहादुर रानामगरको नेतृत्वमा शहीद लखन थापाको शालिक निर्माण तथा पुनस्थापना समिति गठन गरिएको छ ।
सहमति अनुसार मंगलबारदेखि निर्माण सुरु गरिने भएको छ । पहिलेकै ढाँचा र स्वरुपमा शालिक निर्माण गर्ने र लखनचोकको केन्द्र भागमै पुनस्र्थापना गर्ने, शालिकको सुरक्षा जिल्ला प्रशासनले गर्ने, शालिक पुनस्र्थापना गर्न लाग्ने सम्पूर्ण खर्च महानगरपालिकाले व्यहोर्ने सहमति पनि भएको छ ।
प्रशासनले रातारात शालिक रहेको आइल्याण्ड हटाउने कार्यले आमनागरिक र सर्वसाधारणमा पुग्न गएको भावनात्मक चोटप्रति महानगरपालिकाले क्षमायाचना समेत मागेको छ ।
महानगरपालिका सहित जिल्ला ट्राफिक प्रहरी कार्यालय र सडक डिभिजन कार्यालय, पोखराले पोखराका आइल्याण्डहरूका कारण ट्राफिक जाम बढेको भन्दै हटाउने तयारी गरेको थियो ।
मगर संघ कास्कीसँग महानगरले आइल्याण्डको साइज सानो बनाएर प्रथम शहीदको शालिक राख्ने भन्नेमा सहमति गरेको थियो । तर, आइल्याण्ड पूरै हटाइएपछि मगर समुदाय आक्रोशित बनेका छन् ।
तत्कालिन अवस्थामा पृथ्वीनारायण शाहको शालिक रहेको सो स्थानमा ०६२०६३ को जनआन्दोलनका क्रममा माओवादीले पृथ्वीनारायणको शालिक भत्काइदिएका थिए । त्यसपछि खाली रहेको सो चोकमा २०६४ सालमा मगर संघ कास्कीले प्रथम शहीद लखन थापाको शालिक राखेको हो । २०६५ सालमा पूर्ण कदको शालिक राखिएकोमा २०६७ सालमा तत्कालिन प्रधानमन्त्री डा बाबुराम भट्टराईले सो शालिकको अनावरण गरेका थिए । तस्बिर ः जक्सन डटकमबाट