बुटवल, ७ असोज/मध्यरातमा पहिरो खसेपछि बुटवलबाट पोखरा आउने र अनेत्र जाने यात्रु अलपत्र परेका छन् । पहिरोले तानसेन सडक खण्डको सिद्धबाबा सडक क्षेत्र अबरुद्ध भएको छ ।
पाल्पाको तिनाउ गाउँपालिका अन्तर्गत दोभान सिद्धबाबा क्षेत्रमा ढुंगे पहिरो खसेको हो । सडकमा ठूला ठूला ढुंगा खसेर बाटो बन्द भएको प्रहरीले जानकारी दिएको छ ।
सिद्धार्थ राजमार्ग अन्तर्गत सो क्षेत्रमा खसेको पहिरोले मध्यरातदेखि सडकमा सयौं सवारी र त्यसमा सवार यात्रुहरुको लाइन लागेको छ । एकतर्फी भएपनि सडक खुलाउने प्रयास भैरहेको प्रहरीले जानकारी दिएको छ ।
सडक अबरुद्ध हुँदा बुटवलबाट पाल्पा, गुल्मी, स्याङजा, पोखरा, पर्वत, अर्घाखाँची जाने र सो क्षेत्रबाट बुटवल फर्कने यात्रुहरु बिचल्लीमा परेका छन् । चाडबाडका लागि घर जान लागेका यात्रुहरु रातभर सडकमै बिताउन बाध्य भएका छन् ।