माछापुच्छ्रेको आगनमा विश्वकपको ट्रफी

सागर राज तिमिल्सिना
पोखरा, १० कात्तिक /नेपाल टुरमा रहेको आईसिसी क्रिकेट विश्वकपको ट्रफी शनिबार विहान पोखरामा सार्वजनिक गरिएको छ ।
माछापुच्छ्रेको आगनमा चलिरहेको पोखरा प्रिमियर लिगमा र पोखराको ताल बाराही मन्दिरमा विश्वकपको ट्रफी सार्वजनिक गरिएको हो ।

नेपाली क्रिकेट राष्ट्रिय टोलीका टिम क्याप्टन पारस खड्का, ज्ञनेन्द्र मल्ल र युवा खेलाडी सन्दीप लामिछानेले ट्रफी सार्वजनिक गरेका हुन् ।
विश्वकपको ट्रफी अघिल्लो दिन मात्रै काठमाडौंको स्वयम्भुमा सार्वजनिक गरिएको थियो ।

त्यसपछि पोखरा ल्याइएको ट्रफी पोखरा रंगशाला क्रिकेट मैदानमा ल्याइएको हो । पोखरा प्रिमियर लिगकै समयमा सार्वजनिक गरेपछि ट्रफीलाई शनिबार नै काठमाडौ लगिएको छ । ट्रफी सार्वजनिक गर्न प्रिमियर लिगमा सुरक्षाकर्मी र स्वयंसेवकले सुरक्षा प्रदान गरेका थिए ।