पोखरा, २५ असोज/चितवन निवासी शारिरीक अपांगता भई मुख कलम च्यापेर लेखेर एस ई ई उतिर्ण गरि एघार कक्षा अध्ययनरत भरत तमुलाई तमु धिं नेपालको ३३ औं साधारणसभामा संकलित १ लाख १३ हजार २६५ रुपैया हस्तान्तरण गरिएको छ । भरत तमु सहयोग समिति पोखराको पहलमा तमु धिं नेपालमा संकलित उक्त रकम सहयोग समितिकी संयोजक लक्ष्मी तमु र तमु धिं नेपालकी अध्यक्ष कर्म तमुले भरत तमुलाई उच्च शिक्षा अध्ययन सहयोगार्थ हस्तान्तरण गर्नुभएको हो ।
भरत तमुको उच्च शिक्षाका लागि तमु धिं नेपालले १० हजार, तमु धिं नेपाल केन्द्रीय आमा समितिले ७ हजार ५ सय, तमु ट्हो ह्युल हंगकंगका पुर्व अध्यक्ष कमल तमुले ५ हजार, तमु धिं नेपाल साउदी अरब प्रवास शाखाले ४ हजार लगायत साधारणसभामा उपस्थित विभिन्न तमु समाज, आमा समिति, सहयोगदाता महानुभावहरुले उक्त रकम सहयोग गर्नुभएको हो ।
तमु धिं नेपालको साधारणसभामा भरत तमुको बारेमा सहयोग समितिकी सदस्य विना तमुले जानकारी गराउनुभएको थियो भने भरत तमुले मुखले कलम च्यापेर राम्रा अक्षरमा “तमु धिं नेपाल, कास्की पोखराका सम्पुर्ण महानुभावहरुमा म जस्तो अपांगहरुलाई उच्च शिक्षाको लागि हौसला जोस जाँगर बढाइ दिनु भएकोमा म भरत तमुको तर्फबाट मुरी मुरी धन्यवाद छ” लेखेर धन्यवाद व्यक्त गर्नुभएको थियो । भरत तमुलाई उनको आमा र सहयोगीका साथ भरत तमु सहयोग समिति कास्की पोखराले तमु धिं नेपालको साधारणसभामा सहयोगको अपेक्षा सहित सहभागी गराएका थिए ।