नेपालगञ्ज, ८ बैशाख/गण्डकी प्रदेश आठौं राष्ट्रिय खेलकुद प्रतियोगिता अन्तरगत राष्ट्रिय ह्याण्डवल प्रतियोगिताको महिला तथा पुरुषको टिम सेमिफाइनलमा प्रबेस गरेको छ । गण्डकी प्रदेशले आफ्नो लिग चरणका तीन/तीन खेलमा लगातार जित हासिल गरी अन्तिम चारमा स्थान बनाएको हो ।
नेपालगन्जको जिल्ला प्रशासन कार्यालय परिसरमा भएको महिला तर्फको खेलमा गण्डकी प्रदेशले कर्णाली प्रदेश माथि एकतर्फी शुन्यका बिरुद्ध २४ गोल बर्षाएको थियो । लिगको तेश्रो खेलमा दिप्ती गुरुङले डवल ह्याट्रिक पुरा गरिन् । गण्डकी प्रदेशले लिगको अन्तिम खेल त्रिभुवन आर्मीसंग आइतबार खेल्ने भएको प्रशिक्षक बिष्णु गुरुङले बताए ।
आइतबारको खेलमा जितेमा समुह विजेता हुदै र पराजित भएमा समुह उपविजेता हुदै गण्डकी प्रदेश अन्तिम चारमा यात्रा बनाउने भएको हो । त्यसै गरी नेपालगन्जको रंगशाला परिसरमा शनिबार भएको पुरुष तर्फको खेलमा त्रिभुवन आर्मीलाई गण्डकी प्रदेशले २१ को बिरुद्ध २४ गोल गरी अन्तिम चारमा स्थान पक्का गरेको हो ।
गण्डकीको जितमा सन्तोस श्रेष्ठले सर्वाधिक ११ गोलको योगदान दिए । गण्डकीका गोलरक्षक बिशाल नेपालीले पटक पटक आर्मीको प्रहारलाई उत्कृष्ट बचाउ गरेका थिए । लिगको अन्तिम खेल गण्डकी प्रदेशले आइतबार प्रदेश नम्बर ५ संग प्रतिष्प्रर्धा गर्ने भएको प्रशिक्षक भिमशेन शाक्यले बताए । उक्त टिमलाई जितेमा समुह विजेता हुदै सेमिफाईनलमा प्रबेश गर्छ भने पराजित भएमा समुह उपविजेता हुदै सेमिफाईनलमा प्रबेस गर्छ ।
शनिबार भएको लिग चरणको पहिलो खेलमा प्रदेश नम्बर ५ ले हेमन्त थापाको ६ गोलको मद्धतले कर्णाली प्रदेशलाई २२–१८ को गोल अन्तरले पराजित गरेको हो । कर्णालीका केशव विष्टले ७ गोल गरे । उनले यस अघिका खेलमा पनि न्यूनतम ५ गोल भन्दा माथि गर्दै आएकाछन्।
यसैबीच, पुरुष तर्फ भएको तेस्रो खेलमा विभागीय सशस्त्र प्रहरी बलको एपीएफले प्रदेश नं १ लाई २६–१० गोलले हरायो । एपीएफका लोकेन्द्र चन्द र रणसिंह साउदले सर्वाधिक ६ गोलको बराबरी योगदान गरे ।
चौथो खेलमा प्रदेश नं ३ ले प्रदेश नं २ लाई ३६–१४ को फराकिलो गोल अन्तरले हरायो । उक्त खेलमा प्रदेश नं ३ का आशिष अधिकारीले सर्वाधिक १३ गोल गरे । शुक्रबार स्थगित प्रदेश नं ५ र प्रदेश नं ७ बीचको खेल १४–१४ मा टुंगियो ।
यता, महिलातर्फको ह्याण्डबलमा शनिबार भएको पहिलो खेलमा विभागीय नेपाली सेनाको त्रिभुवन आर्मी क्लबले प्रदेश नं ५ लाई ४४–७ को फराकिलो गोल अन्तरले हरायो । आर्मीकी शान्तिकला राईले सर्वाधिक ९ गोल गरिन् ।
शनिबार नै भएको महिलातर्फको दोस्रो खेलमा प्रदेश नं ३ ले प्रदेश कर्णाली प्रदेशलाई ८–५ गोलले हरायो । उक्त खेलमा प्रदेश नं ३ की निरुता बुढाथोकी मगरले सर्वाधिक २ गोल गरिन् ।
त्यस्तै, तेस्रो खेलमा प्रदेश नं १ ले प्रदेश नं २ लाई २२–५ गोलले हरायो । उक्त खेलमा प्रदेश नं १ की निशा राईले सर्वाधिक १३ गोल गरिन् । चौथो खेलमा विभागीय सशस्त्र प्रहरी बलको एपीएफ क्लबले प्रदेश नं ७ लाई ३५–१ को फराकिलो गोल अन्तरले हरायो । उक्त खेलमा एपीएफकी उमा राइले सर्वाधिक १० गोल गरिन् ।
त्यसै गरी गण्डकी प्रदेशका खेलाडीहरुले विभन्नि ठाउँमा भएको खेलमा उत्साहजनक रुपमा सहभागिता जनाएको पशिचमाञ्चल क्षेत्रिय खेलकुद विकास समितिका अध्यक्ष सम्पन्न श्रेष्ठले बताए । खुल्ला तर्फ हुने आर्चरी, वडिविल्डिङ र ट्रायथलन तर्फको मेडलको कुनै टिमका गणना नहुने उनले जनाए ।
त्यसै गरी नेपालगन्ज स्थित महेन्द्र बहुमुखी क्याम्पसमा भएको आइटिएफ तेक्वान्दोबाट गण्डकी प्रदेशले ३ वटा रजत पदक हात पारेको सहायक प्रशिक्षक प्रतिक घर्तीमगरले बताए । उनका अनुसार सुस्मीता थापा, वसन्ती थापा र समुह महिला तर्फ दोश्रो हुदै रजत पदक हात पारेका हुन्। महिला टिममा मसिना तामाङ, स्नेहा तामाङ, सुस्मिता थापा, सृजना थापा र अनुष्का बुढा रहेका थिए ।
नेपालगन्जको रंगशाला परिसरमा सुटिङ र उसुको खेल जारी रहेको छ । शनिबार सुटिङ तर्फ महिला तथा पुरुष को एयर राइफल र एयर पेष्तोलको पहिलो चरणको खेल भएको ओलम्पियन भगवती केसीले बताइ् । उनका अनुसार महिला पुरुषका ८ जना खेलाडीहरु प्रतियोगितामा सहभागि भएकाछन्। त्यसै गरी गण्डकी प्रदेशबाट उसु तर्फ थाउलो र सानसौ गरी महिला तथा पुरुषका २२ जना खेलाडीहरु सहभागि भएको प्रशिक्षक दिल बहादुर किसानले बताए । शनिबार क्वाटरफाईनलका खेलहरु भएकाछन्।
त्यसै गरी नेपाल प्रहरीको तालिम केन्द्रमा भएको आर्चरी प्रतियोगितामा कास्कीका खेलाडीहरुले उत्कृष्ट प्रर्दशन गरेकाछन्। उक्त प्रतियोगितामा कास्कीले कम्तिमा ४ वटा स्वर्ण पदक ल्याउने प्रमुख निर्णायक योगेन्द्र शेरचनले बताए । पुरुष एकल तर्फ आर्मीका तवीन गुरुङ र काठमाण्डौंको वेस आर्चरीका प्रन्जल राई फाईनलमा प्रबेस गरेकाछन्।
सोहि इभेन्टको महिला तर्फ अन्नपूर्ण आर्चरी क्लव कास्कीकी अर्चना थापा र अन्नपूर्णकै अनुसा गुरुङ फाईनलमा प्रबेश गरेकाछन्। स्ट्याण्डर पुरुष समुह तर्फ आर्मी र वेस आर्चरी फाईनलमा प्रबेश गरेका छन्। ३० मिटरको दुरीमा महिला समुह तर्फ अन्नपूर्ण आर्चरी क्लव र कन्चनपुर आर्चरी क्लव फाइनलमा प्रबेस गरे ।
मिक्स टिम तर्फ अन्नपूर्णका राजकुमार छन्त्याल र अर्चना थापाको जोडी फाईनलमा पुग्दा आर्मीका तविन गुरुङ गुरुङ र मन्वु बजगाइ फाइनलमा पुगेका हुन्। ७० मिटर रिकभ खुल्ला एकल तर्फ कास्कीका आशिम शेरचन र मुकेस तामाङ फाइनलमा प्रबेस गरे भने महिला तर्फ आर्मीकी ज्ञानु अवाले र आर्मीकै मित्र राइ फाईनलमा यात्रा बनाएका हुन्।
पुरुष एकल ५० मिटर तर्फ जाग्रित गुरुङ र राजेश राना फाइनलमा प्रबेश गरे । टिम रिकभ पुरुष तर्फ कास्की र नेपाल पुलिस फाईनलमा प्रबेश गरे । रिकभ मिक्स टिममा आर्मीका रोसन नगरकोटी र ज्ञानु अवालेको जोडी तथा आर्मीका डम्बर थापा र आयिषा तामाङ फाइनलमा प्रबेस गरे ।
त्यस्तै पुरुष तर्फ भएको फुटवल खेलमा एपिएफसंग गण्डकी प्रदेश २–१ ले पराजित भएको प्रशिक्षक शम्भु केसीले बताए । गण्डकी प्रदेशले लिग चरणका दुई खेलमा पराजित एकमा बराबरी खेलेको छ । आइतबार गण्डकी प्रदेशले प्रदेश नम्बर १ संग औपचारिकताको लागि खेल्ने भएको छ ।