पोखरा, २८ साउन/ पोखराको न्युरोडमा रहेको युनाईटेड नेपाल बहुउद्देश्यीय सहकारी संस्थाको १० औँ साधरण सभा सम्पन्न भएको छ । कार्यक्रमको उदघाटन गर्दै जिल्ला सहकारी संघ लिमिटेडका बरिष्ठ प्रबन्धक भोजराज घिमिरेले सहकारीका मुल्य र मान्यतामा काम गर्न पर्नेमा जोड दिए ।
कार्यक्रममा बरिष्ठ अधिबक्ता कृष्ण थापा क्षेत्री, ईन्जिनिर किसान सिंह गुरुङले हरेक क्षेत्रमा आर्थिक अनुशासन महत्वपुर्ण रहेको भन्दै त्यसलाई ख्याल गरेर अगाडी बढ्दा सफल भईने उल्लेख गरे । साधरण सभाले अध्यक्ष पदम बहादुर गुरुङ, सचिव मन्त्रीराज उलक, कोषाध्यक्ष गितादेवी चपाँई, लखा समिति संयोजक डोलराज पोख्रेलको बार्षिक प्रतिबेदन सर्बसम्मतीले पारित गरेको छ ।
संस्थाका कार्यकारी निर्देशक राजेन्द्रमान श्रेष्ठले देश आर्थिक विकासको मेरुदण्डको रुपमा सहकारी स्थापित भएकाले सामाजिक आर्थिक तथा शैक्षिक विकास , रोजगारी सिर्जना गर्दै यस आर्थिक बर्षमा संस्थाले सेयर सदस्यता बढाउदै कर्जा, निक्षेप ५ करोड बडी पुर्याउने , सेयर पुँजीमा बृद्धि गर्दै ३ करोड पुर्याने लक्ष्य राखिएको बताए ।
संस्थाले यस बर्षको उत्कृष्ट बचतकर्तामा गिर बहादुर खत्री, उत्कृष्ट ऋणी शान्ति पौडेल, उत्कृष्ट कर्मचारी वरिष्ठ कर्जा अधिकृत दिनेश शर्मा, उत्कृष्ट बजार प्रतिनिधि लक्ष्मी प्रधानलाई सम्मान गरेको छ भने संस्थामा नवप्रवेशी सेयर सदस्यलाई स्वागत तथा सम्मान गरेको छ । संस्थाका अध्यक्ष पदमबहादुर गुरुङको अध्यक्षतामा भएको कार्यक्रममा स्वागत उपाध्यक्ष दिनबन्धु पौडेल र संचालन संचालक समितिका सदस्य श्याम बहादुर श्रेष्ठले गरेका थिए ।