काठमाडौं । त्रिभुवन विश्वविद्यालय (त्रिवि) को वार्षिक परीक्षा दसैं पछाडि हुने भएको छ । कोभिड–१९ को संक्रमण बढ्न थालेपछि तत्काल वार्षिक परीक्षा सम्भव नभएपछि दसैं पछाडि नै परीक्षा गर्ने तयारी गरिएको परीक्षा नियन्त्रण कार्यालय (पनिका)का परीक्षा नियन्त्रक पुष्पराज जोशीले जानकारी दिएका छन् ।
परीक्षा नियन्त्रण कार्यालयले वार्षिक परीक्षा आफैंले सञ्चालन गर्ने र सेमेस्टर परीक्षाको जिम्मा भने सम्बन्धित डिन कार्यालयलाई दिएको छ । यसअघि बन्दाबन्दी (लकडाउन) खुलेसँगै सवारी साधन सञ्चालन भएपछि पनिकाले भदौ १६ गतेबाट सेमेष्टर र असोजको पहिलो हप्ताबाट वार्षिक परीक्षा गर्ने तयारी थियो । ‘अहिलेको स्थितिमा दसैं अगाडि कुनै पनि परीक्षा गर्न सहज छैन ।’ उनले भने, ‘अब वार्षिक अन्तर्गतका सबै परीक्षा दसैंपछि नै हुन्छन् ।’
उनका अनुसार मंसिर १५ वा २० गतेदेखि परीक्षा गर्ने गरी तयारी गरिने बताए । परीक्षा नियन्त्रण कार्यालयले मंसिर २० देखि परीक्षा सञ्चालन गरेर चैतसम्म सबै सकाउने तयारी गरेको छ । नियन्त्रक जोशीले चैतसम्म सबै बाँकी रहेका परीक्षा सकाएपछि शैक्षिक क्यालेन्डरमा कुनै असर नपर्ने जानकारी दिएका छन् । ४ वर्षे शैक्षिक कार्यक्रमलाई ४८ महिनामा सकाउने लक्ष्य परीक्षा नियन्त्रण कार्यालयको रहेको छ । अहिले ती ४ वर्षे शैक्षिक कार्यक्रम ४५ देखि ४६ महिनामा सकिने गरेका छन् ।
धेरै विद्यार्थी भएको तहमा भर्चुअल परीक्षा असम्भव
परीक्षा नियन्त्रक जोशीले सेमेस्टर प्रणाली परीक्षाको खाका सहितको प्रतिवेदन सम्बन्धित डिन कार्यालयले बुझाएपछि कसरी परीक्षा गर्ने भन्नेबारे छलफल हुने बताए । ‘सेमेस्टर परीक्षाका बारेमा भर्चुअल माध्यमबाट परीक्षा लिने भन्ने कुरा पनि चलेको छ ।’ उनले भने, ‘तर कति सम्भव हुन्छ डिन कार्यालयले बुझाएको प्रतिवेदन बुझाएपछि गर्ने वा नगर्ने भन्ने हुन्छ ।’ उनले सेमेष्टर प्रणालीका पनि धेरै विद्यार्थी भएको तहमा भर्चुअल माध्यमबाट परीक्षा सम्भव नभएको बताएका छन् । रासस