अख्तियार दुरुपयोग अनुसन्धान आयोगले माओवादी लडाकूको नाममा भएको भ्रष्टाचार छानबिन अन्तिम चरणमा पुर्याएको तथ्य खुलेको छ । अख्तियारका प्रमुख आयुक्त लोकमानसिंह कार्कीले नै लडाकूको नाममा भएको भ्रष्टाचारको छानबिन अन्तिम चरणमा पुगेको तथ्य खोलेका आजको राजधानीमा खबर छ ।
‘माओवादी लडाकूको नाममा भएको भ्रष्टाचारबारे अनुसन्धान अधिकृत तोकेर छानबिनलाई अन्तिम चरणमा पुर्याइएको छ, जतिसक्दो चाँडो त्यो भ्रष्टाचारको छानबिन पूरा गरिन्छ,’ प्रमुख आयुक्तमा नियुक्त भएपछि बुधबार पहिलो पटक बीबीसी नेपाली सेवामार्फत आफ्नो भनाइ राख्दै प्रमुख आयुक्त कार्कीले भने । उनले छानबिनको दायरामा जतिसुकै ठूलो व्यक्ति आए पनि नछाडिने उद्घोष पनि गरे ।
अनुसन्धान अधिकृतले छानबिनलाई अन्तिम चरणमा पुर्याएको जानकारी दिइसकेका छन्, त्यसमा जतिसुकै उच्च ओहदा वा विशिष्ट व्यक्ति भए पनि अख्तियारले छाड्दैन, सबैभन्दा उच्च व्यक्तिकै संलग्नता देखियो भने पनि हामी कारबाही गर्छौ,’ कार्कीले भने । पूर्वलडाकूको नाममा २० अर्ब रुपैयाँ भ्रष्टाचार भएको भन्दै एमाओवादी अध्यक्ष पुष्पकमल दाहालसहितका नेताविरुद्ध उजुरी परेको थियो ।
उजुरीमा ४ अर्ब रुपैयाँ हुँदै नभएको लडाकूको नाममा र १६ अर्ब लडाकूको नाममा भ्रष्टाचार गरिएको जिकिर गरिएको छ । उजुरीमा एमाओवादी अध्यक्ष दाहाल, उपाध्यक्ष तथा पूर्वप्रधानमन्त्री डा.बाबुराम भट्टराई, कृष्णबहादुर महरा, वर्षमान पुन, नन्दकिशोर पुन र जनार्दन शर्माले सो रकम भ्रष्टाचार गरेको जिकिर गरिएको छ ।
अघिल्लो उजुरीको छानबिन नभएको भन्दै युवा संघ नेपालले समेत दलबलसहित अख्तियार पुगेर गत ५ असोज २०६९ मा लिखित उजुरी दिएको थियो । कुराकानीका क्रममा प्रमुख आयुक्त कार्कीले नक्कली भ्याट बिलमा १ हजार ६ सय ५० जना दोषी पाइएकाले अन्तिम चरणको छानबिन भइरहेको रहस्योद्घाटन पनि गरे ।
आन्तरिक राजस्व विभागसँग मिलेर गरिएको छानबिनमा पहिलो चरणमा ती व्यापारीहरूले नक्कली भ्याट बिल बनाएर राजस्व छली गरेको पाइएको कार्कीले खुलासा गरेका हुन् । ‘अख्तियार र आन्तरिक राजस्व विभाग मिलेर नक्कली भ्याट बिलको छानबिन गरिरहेको छ, राजस्वले पहिलो चरणमा १ हजार ६ सय ५० जनाले भ्याट छली गरेको तथ्य फेला पारी थप अनुसन्धान अघि बढाएको छ, चाँडै नतिजा आउँछ,’ कार्कीले भने ।
‘आन्तरिक राजस्व विभागका सबै कर्मचारीलाई मैले १५ दिनअघि बोलाएर भ्याट छलीको फायल दिन भनेको छु, पहिलो चरणमा नै उल्लेख्य मात्रामा भ्याट छली गरेको तथ्य आएको छ,’ कार्कीले भने । भ्याट छलीमा अभियुक्त देखिएका सबैलाई कडा कारबाही हुने उनले प्रस्ट पारे । उनले भ्याट छलीमा करिब २ हजारसम्म पुग्ने अनुमान रहेको बताए । यस्तै, कार्कीले अहिलेसम्म २ सय ५० जना अकूत सम्पत्ति छानबिन भइरहेको जानकारी दिए ।
– See more at: http://setopati.com/chapa-bata/2992/#sthash.WPqK1BgC.dpuf