पूर्वाञ्चल विश्वविद्यालयमा वर्षभरिकै खरीद 'गुपचुप'

 जिन्सी शाखा स्रोतबाट प्राप्त जानकारी अनुसार उक्त आर्थिक वर्षमा के कति र कस्ता सामान खरीद गरिएका छन्, त्यसको हिसाब ‘निल’ छ। ‘कति सामान खरीद गरियो र के–के ल्याइयो एक रूपैयाँको बिल आएको छैन,’ जिन्सी शाखा स्रोतले सेतोपाटीसँग भन्यो, ‘जिन्सी शाखाले एउटा सामग्री पनि बुझेको छैन।’

एक अधिकारीका अनुसार भ्रष्टाचार गर्नकै निमित्त जिन्सी शाखालाई निस्कृय बनाएर सामान खरीद गरिएको छ। यो शाखालाई कार्यालयमा खरीद गरिएका सामग्रीको रेकर्ड राख्ने अख्तियारी हुन्छ।

विश्वविद्यालयमा उक्त आर्थिक वर्षमा खरीद ऐन नियमावली विपरीत करोडौं मूल्यका सामग्री खरीद गरिएको छ। २०६९ भदौमा पूर्वाञ्चल विश्वविद्यालयको केन्द्रीय कार्यालय नेशनल ट्रेडिङबाट पुष्पलाल चोक सारेयता धेरै महंगा सामग्री खरीद गरिएको छ। कार्यालय सारेयता करिब १६ करोडको खरीद गरिएको स्रोतको दाबी छ। ‘यो वर्षभरिको सामान खरीदको हिसाबकिताब निल छ,’ जिन्सी शाखाका ती कर्मचारीले भने।

शिक्षामन्त्री माधव पौडेलको निर्देशनमा विराटनगर आइपुगेको विश्वविद्यालय अनुदान आयोगको टोलीलाई विश्वविद्यालयका एक कर्मचारीले सामान खरीदमा भएको घोटालाबारे लिखित जानकारी दिएका छन्। ‘मैले खरीदको हिसाबकिताब निल भएको कुरा टोलीलाई लिखित रूपमै दिएको छु,’ ती कर्मचारीले भने, ‘सबैकुरा छानविन गर्न अनुरोध गरेको छु।’

विश्वविद्यालय अनुदान आयोग सदस्य सचिव भोला पोखरेलको नेतृत्वको पाँच सदस्यीय समितिले घोटालाबारे छानविन गरिरहेको छ। स्रोतका अनुसार त्यसरी सामग्री खरीद गर्दा तोकिएको मूल्यभन्दा तेब्बर बिल बनाइएको छ।

‘कतिपय सप्लायर्सलाई ७७ देखि ९० प्रतिशतसम्म अग्रिम भुक्तानी दिइएको छ भन्ने पनि सुनेको छु,’ ती कर्मचारीले भने। खरीदमा घोटाला गर्नकै लागि विश्वविद्यालयको जिन्सी शाखालाई चार महिनासम्म नेशनल ट्रेडिङमै राखिएको थियो। यो अवधिमा बढीभन्दा बढी खरीद भएको ती कर्मचारीले बताए।

कलेजलाई सम्बन्धन, सामान खरीद, अक्षयकोष दुरूपयोग, कलेज सम्बन्धन फारम लगायतमा विश्वविद्यालय उच्च पदाधिकारीबाट करोडौं घोटाला भएको आशंकामा मन्त्रालयको टोलीले छानविन गरिरहेको छ। कलेज सम्बन्धनमा अपचलन गरिएको ६ करोड, निवेदन फारममै तीन करोड, अक्षयकोषमा जम्मा हुनुपर्ने अढाई करोड घोटाला भएको स्रोतको भनाइ छ ।