· रेस्क्यु टावर बनेपछि शसस्त्र प्रहरीले फेवामा भएका दर्जन बढि घटनाहरुबाट मानिसहरुको जिवितै उद्धार गर्न सफल भएको छ ।
पोखरा, १९ मंसिर /सशस्त्र प्रहरी बल, मुक्तिनाथ बाहिनीका सहायक बाहिनीपति एसएसपी कृष्णभक्त बर्माचार्य सहितको एक टोलीले पोखराको फेवातालमा रेकि गरेको छ । शसस्त्र प्रहरीको रेस्क्यु बोट मार्फत तालबाराही घाटदेखि फेवातालको विभिन्न किनार र डुँगा घाटहरुमा रेकि गरिएको हो ।
खासगरि यतिबेला पोखरामा आन्तरिक तथा वाह्य पर्यटकको समेत बढेको र फेवाताल घुम्न जानेहरुको संख्या पनि बढिनै भएकाले फेवातालमा रेकि शुरु गरिएको बर्माचार्यले बताए । ‘शैक्षिक भ्रमणका लागि बाहिरी जिल्लाहरुबाट थुप्रै विद्यार्थीहरु पोखरा घुम्न आएका छन्, यो बेला फेवातालमा हुन सक्ने सम्भाव्य दुर्घटनाको अध्यायन तथा अवलोकनका लागि पनि रेकि गरिएको हो’ उनले भने । आवश्यकता अनुसार कार्यक्रमलाई अगाडी बढाइने उनले बताए ।
रेकिका क्रममा फेवातालमा डुँगा सयर गर्दै गरेकाहरुले लाइफ ज्याकेट नलगाई बोटिङ्ग गरेको भेटिएको उनले जानकारी दिए । ‘डुँगा घाटबाट त लाइफ ज्याकेट लैजाँदा रहेछन्, तर तालको विचमा पुगेपछि खोल्ने प्रबृत्ति देखियो’–उनले भने । शसस्त्र प्रहरीले सरोकारवाला निकायहरुसंगको सहकार्यमा बाराही घाटमा रेस्क्यु टावर निर्माण गरेपछि केहिवर्ष यता फेवामा हुने दुर्घटनामा परि ज्यान गुमाउनेको संख्या घटेको छ । फेवातालमा प्याराग्लाइडिङ्ग तथा डुँगा दुर्घटनामा परि सयौंले ज्यान गुमाइसकेका छन् ।
गत चैत्र महिनामा नेपाल हवाई खेलकुद संस्थाले आयोजना गरेको प्रि वल्र्डकप प्याराग्लाइडिङ्ग प्रतियोतिगामा हावाहुरिका कारण अनियन्त्रित भई फेवातालमा खसेका ५ जनालाई शसस्त्र प्रहरीले तत्काल उद्धार गरेको थियो । त्यस्तै ०७१ कै असोजमा हेम्जाकि सुनिता थापाले उडाएको प्याराग्लाइडिङ्ग तालमा खसेपछि शसस्त्र प्रहरीले उनको पनि तत्कालै उद्धार गरेको थियो । शसस्त्र प्रहरीले फेवातालमा भएका दजर्न बढि घटना परेकाहरुलाई जिवितै उद्धार गरिसकेको छ । ‘माथि टावरबाट दुरविन मार्फत तालमा हेर्छौ, कहिं केहि घटना भएजस्तो देखिए तत्काल रेक्क्यु बोट मार्फत त्यहाँ पुग्छौं र उद्धार गर्छौ’–बर्माचार्यले भने ।