पोखरा, १३ भदौ/पोखराको चिप्लेढुङ्गामा रहेको मेलोडी क्याफे एन्ड लाउन्ज वारले प्रदेश नम्बर चारमा गीत संगित क्षेत्रमा योगदान दिएको व्यक्तीलाई सम्मान गर्न ‘मेलोडी अवार्ड’ को घोषणा गरेको छ । मेलोडी क्याफेले दोस्रो वार्षिकोत्सवको अबसरमा नगद २५ हजार ५ सय २५ रुपैया सहित, ताम्रपत्र र दोसल्लाले गीतकार तीर्थ तामाङलाई अवार्ड प्रदान गर्ने घोषण गरेको छ ।
कवि तथा संस्कृतिकर्मी तीर्थ श्रेष्ठको संयोजकत्वमा गठित प्रतिभा छनौट समितिको सिफारिसको आधारमा तामाङलाई अवार्ड प्रदान गर्न लागिएको सोमवार पोखरामा आयोजित पत्रकार सम्मेलनमा बारका सञ्चालक तथा गायक विनोद बानियाले जानकारी दिए । तामाङलाई भदौ २१ गते अवार्ड प्रदान गर्ने बानियाले जानकारी दिए ।
प्रदेशनम्बर ४ मा रहेर गीत संगीतमा योगदान पुर्याउने ब्यक्तिहरुको तर्फबाट पहिलोपटक तामाङलाई सम्मान गर्न लागिएको उनले बताए । तीन दशकसम्म गीत संगीतको क्षेत्रमा क्रियाशिल तामाङलाई दिने निर्णय भएको बानियाँले बताए ।
४० को दशकदेखि नै लेखन थालेका तामाङको झण्डै ३० वटा गीत रेकर्ड भएका छन् । उनले लेखेका गीतमा कर्ण दास, विवेक श्रेष्ठ, विनोद बानियाँ लगायतले आवाज भरेका छन् । २०५० सालमै कर्ण दासको आवाज र सुन्दर थापाको संगीतमा ‘ब्यर्थै फेरि घाइते मुटु बल्झियो ’ वोलमा उनको पहिलो गीत रेकर्ड भएको थियो । यो गीतले कर्णदासलाई थुप्रै अवार्ड समेत जितेका थिए ।
गायक बानियाँ सहित शेखर शेरचन, गणेश बसौला, अशोककुमार गुरुङले सञ्चालन गरेको मेलोडी क्याफेले अवार्डलाई निरन्तरता दिने जानकारी दिएका छन् ।