पोखरा, २४ असार/नेकपा माओवादी केन्द्रका प्रवक्ता पम्फा भुषालले सहमतीय सरकारको नेतृत्व लिन माओवादी तैयार रहेको बताएकी छन् । प्रेस सेन्टर नेपाल कास्कीको एकता अधिवेशनको शुक्रबार पोखरामा उद्घाटन गर्दै उनले जसको नेतृत्वमा सहमती हुन्छ त्यसैको नेतृत्वमा राष्ट्रिय सहमतीको सरकार बनाउनु पर्ने र नेतृत्व दिए माओवादी पछि नहट्ने बताइन् ।
“संविधान कार्यान्वयन, जनताका भावनालाई सम्वोधन र शान्ति प्रकृयाका वांकी काम पूरा गर्न सहमतीको विकल्प छैनै उनले भनिन् –सहमती कायम गर्नका लागि नेकपा माओवादी केन्द्रले पहल सुरु गरेको बताइन् । दुई ठूला पार्टी वीचको सहमती एक वर्ष अघि टुटेपछि नेकपा एमालेको नेतृत्वमा माओवादी लगायतका दलहरु मिलेर सरकार बनेको स्मरण गराउंदै प्रवक्ता भुषालले बहुमतीय आधारमा बनेको सरकार प्रभावकारी हुन नसकेको बताइन् ।
कार्यक्रममा नेकपा माओवादी केन्द्रका जिल्ला संयोजक राजकाजी गुरुङ्ग, सल्लाहकार कोमलनाथ बराल, नेपाल प्रेस युनियनका केन्द्रीय उपाध्यक्ष रमेश पौडेल, महासंघका केन्द्रीय सदस्य सुष्मा पौडेल, प्रेस सेन्टर प्रदेश नं ४ का संयोजक त्रिभुवन पौडेल, पत्रकार महासंघ कास्कीका अध्यक्ष रामकृष्ण ज्ञवाली लगाएतले दल र सरकार दुबैले पत्रकारकालाई प्रयोग मात्रै गरेको आरोप लगाएका थिए ।