पोखरा, २९ जेठ । नेपालका लागि फ्रान्सेली राजदूत एभेस कारमोनले नेपालको पर्यटन उद्योगको भविष्य उज्ज्वल रहेको बताउनुभएको छ । ‘पर्यटन उद्योगमा प्रतिष्पर्धा छ तर नेपालमा हिमाल छ र यसलाई कसैले नक्कल गर्न सक्दैन’, पोखरा उद्योग वाणिज्य संघले उहाँको सम्मानमा शुक्रबार आयोजना गरेको अन्तरक्रिया कार्यक्रममा उहाँले भन्नुभयो,‘धेरै फ्रान्सेलीहरु नेपाल आउन चाहन्छन् र उनीहरु फेरि–फेरि पनि आउँछन् ।’
नेपालको हवाई सेवालाई युरोपेली युनियनले कालो सूचीमा राखेका कारण धेरैभन्दा धेरै फ्रान्सेली नागरिकहरुले नेपालको भ्रमण गर्न हिच्किचाएको उहाँको भनाइ थियो । नेपालले आफ्नो हवाई सेवामा सुधार गर्दै नेपाल एयरलायन्सले विभिन्न ठाउँमा उडान भर्ने हो भने युरोपका धेरै देशबाट पर्यटक ओइरिने उहाँको तर्क थियो । उहाँले नेपालको उड्डयन क्षेत्रमा अनुगमनको कमी भएकोले त्यसमा तत्काल सुधार हुुनुपर्नेमा जोड पनि दिनुभयो ।
पोखरा वरपरको क्षेत्रमा एउटा फ्रान्सेली सिनेमाको सुटिङ भएको सिनेमा आउँदो केही महिना भित्रै प्रदर्शनको तयारीमा रहेको जानकारी दिँदै उहाँले त्यसले पनि फ्रान्सेली जनताहरुमा नेपालप्रतिको मोह बढाउने आशा व्यक्त गर्नुभयो । जनता–जनताबीचको सम्बन्ध स्थापनाले लगानी लगायत अन्य क्षेत्रमा सहयोगको हात बढाउन सकिने उहाँको धारणा थियो ।
कार्यक्रममा फ्रान्सेली राजदूतलाई स्वागत गर्दै पोखरा उद्योग वाणिज्य संघका अध्यक्ष विन्दुकुमार थापाले नेपाल र पोखरामा फ्रान्सेली लगानी भित्र्याउनको लागि आफूहरु तयार रहेको धारणा राख्नुभयो ।
नेपालको जलविद्युत, कृषि र पर्यटन क्षेत्रमा लगानीको ठूलो आवश्यकता र सम्भावना भएको चर्चा गर्दै उहाँले भन्नुभयो–‘ सम्भावना भएका क्षेत्रहरुमा लगानीको लागि हामी फ्रान्सका लगानीकर्तालाई आग्रह गर्दछौँ ।’ उहाँले भूकम्पपछि पनि पोखरा र आसपासका क्षेत्र सुरक्षित रहेकोले बढीभन्दा बढी पर्यटकहरुलाई नेपाल भ्रमणको लागि प्रेरित गर्न राजदूतसँग आग्रह पनि गर्नुभयो । कार्यक्रममा बोल्दै पोखरा उद्योग वाणिज्य संघका कार्यसमिति सदस्य विश्वशंकर पालिखेले फ्रान्समा हुने ट्राभल र टे«ड फेयरहरुमा नेपाली सहभागिता हुन सके नेपालको प्रचार गर्न सजिलो हुने धारणा राख्नुभयो । उहाँले नेपालको उड्डयन क्षेत्रलाई कालोसूचीबाट हटाउनको लागि भूमिका खेल्न राजदूतसँग आग्रह पनि गर्नुभयो ।
पश्चिमाञ्चल होटल संघका अध्यक्ष भरत पराजुलीले १० वर्षे द्धन्द्ध र नाकाबन्दीको समयमा पनि पर्यटकको सुरक्षामा कुनै कमी हुन नदिएको स्मरण गर्दै नेपाल आउने पर्यटकको बसाईमा कुनै समस्या नभएको सन्देश प्रवाहित गर्न राजदूतसँग आग्रह गर्नुभयो । ट्रेकिङ एजेन्सिज एसोसियन अफ नेपाल( टान ) पश्चिमाञ्चल च्याप्टरका उपाध्यक्ष दीपक अधिकारीले भूकम्पपछि फ्रान्सेली सेनाको एक टोलीले धौलागिरी पहिलो आरोहणमा आएर नेपाल सुरक्षित भएको सन्देश दिएकोमा धन्यवाद ज्ञापन गर्दै यहाँका पदयात्रा सुरक्षित रहेको बताउनुभयो । पोखरा उद्योग वाणिज्य संघका प्रथम उपाध्यक्ष देव क्षेत्रीले स्वागत गर्नुभएको कार्यक्रममा संघका पदाधिकारी, कार्य समिति सदस्यहरु र पर्यटन उद्योगसँग आवद्ध व्यक्तित्वहरुको सहभागिता रहेको थियो ।