पोखरा, २१ चैत्र /भुकम्प र नाकाबन्दी पछि सुस्ताएको पर्यटन क्षेत्रलाई चलाएमान बनाउन पोखरा पर्यटन परिषद्ले पर्यटन क्षेत्रको प्रचार गर्न विभिन्न प्रवद्र्धनात्मक सामाग्रीहरु निर्माण गरेको छ ।
पोखरा पर्यटन परिषद्को १५ औँ वार्षिक साधारण सभामा विदेशी र आन्तरिक पर्यटकलाई लक्षित गरि निर्माण गरिएका गाइड बुक, बुकलेट ,सुचना बोर्ड र रेडियो जिगंलको क्षेत्रिय प्रशासक शंकर कोइरालाले विमोचन गरे । चिनिया पर्यटकलाई लक्षित गरि पोखरा आसपासका पर्यटकिय क्षेत्रका बारेमा सामाग्री तयार परिएको छ भने अन्य पर्यटकका लागी अंग्रेजी भाषामा पर्यटकीय गन्त्व्यका बारेमा बुकलेट तयार पारिएको हो ।
नेपाल आएका चिनियाँ पर्यटकहरुलाई लक्षित गरि निर्माण गरिएको बुकलेटले उनीहरुलाई पर्यटकीय स्थलको बारेमा जानकारी लिन सहयोग पुग्ने आशा गरेको पर्यटन परिषद्का अध्यक्ष सोम थापाले बताए । पोखरामा पर्यटक आगमनमा २० प्रतिशतका दरले वृद्धि हुदैँ गएपछि पोखरा आएका पर्यटकलाई सामाग्रीले थप मद्दत पुग्ने र प्रचारप्रसार हुने अपेक्षा रहेको परिषद्का महासचिव रामु गौतमले जानकारी दिए ।
कार्यक्रममा क्षेत्रिय प्रशासक शंकर कोइराला, नेपाली काग्रेस कास्की सभापति कृष्ण केसी, एमाओवादीका नेता रामजी बराल, पोखरा उद्योग वाणिज्य संघका विन्दुकुमार थापा लगायतले सामाग्री पर्यटक लागि निकै उपयोगि हुने बताए । पोखरामा मात्रै पर्यटन क्षेत्रमा ८० अर्बको लगानी रहेको छ भने २ सय बढी होटलका १८ सय बेड रहेका छन् ।