नेपाल क्रिकेट संघ (क्यान) को मातहातमा रहने गरी स्थापना गरिएको नेसनल क्रिकेट एकेडेमी (एनसिए) ले नया कार्यक्रम एसएलसी दिएर बसेका विद्यार्थीलाई लक्षित गरेर ल्याउने भएको छ । एनसिएका प्रशिक्षक तथा नेपाली राष्ट्रिय टोलीका पूर्व कप्तान विनोद दासले बैशाखको पहिलो साता देखि एसएलसी दिएर बसेका विद्यार्थीहरुलाई एनसिएले प्रशिक्षण दिने तयारी गरेको हो ।
एनसिएले माघ देखि १२ वर्ष मुनिका विद्यार्थीहरुलाई विद्यालय क्रिकेट अन्तर्गत हरेक शनिबार निशुल्क प्रशिक्षण दिदैं आएको छ । विधालय क्रिकेटलाई दाससहित दीपेन्द्र चौधरी, राजु बस्नेत, कलाम अली, नीरा राजोपाध्याय, विनु बुढामगर लगायतले प्रशिक्षण दिदै आएका छन् । विधालय क्रिकेटमा ५ सय भन्दा बढी प्रशिक्षण लिन आएपछि उत्साहित हुँदै एसएलसीका विधार्थीमा केन्द्रित हुन लागेको दासले बताए ।
एसएलसी प्रशिक्षण कार्यक्रम सशुल्क हुने दास बताउछन् । यसमा खेलाडीलाई प्रशिक्षणका अलावा, पौडी, फिजिकल फिटनेस र आर्ट अफ लिभिङका कक्षामा समावेश गराइने छ ।
एउटा प्याकेज बनाएर प्रशिक्षण दिन लागेको दासले बताए । नेपालका श्रीलंकाली प्रशिक्षक पुबुदु दासानायकेको अग्रसरतामा एनसिए माघ १ गते देखि सञ्चालनमा छ । दुई प्रशिक्षकमा जगता टमाटा र दास तथा रमन सिवाकोटी कम्प्युटर विश्लेषकका रुपमा छन् । एनसिएले अघिल्लो महिनामात्र आफ्नो पहिलो शाखा खोल्नेक्रममा धनगढी क्रिकेट एकेडेमीलाई मान्यता दिएको थियो । दास र नेपाली राष्ट्रिय टोलीका अर्का खेलाडी शक्ति गौचनले शुक्रबार आधारभूत प्रशिक्षण दिएर धनगढी शाखाको प्रारम्भ गरेका थिए ।