सागर राज तिमिल्सिना
पोखरा, १० माघ/पोखरामा जारी पाँचौ राष्ट्रिय आर्चरी प्रतियोगितामा स्टाडर्ड टिम इभेण्ट्समा बाग्लुङ आर्चरी क्लब प्रथम भएको छ । शुक्रबार कास्की आर्चरी एशोसिएसनसँगको फाइनलमा उसले कुल ६ अंक जोड्दै स्वर्ण जितेको हो । हिमालयन आर्चरी क्लब ललितपुरले मुस्ताङ आर्चरी क्लबलाई पाखा लगाउँदै तेस्रो भयो । कास्की र मुस्ताङले क्रमशः रजत र काँस्य पदक जिते ।
सोही इभेण्ट्सको महिला एकलमा टीआइए काठमाडौकी मानवी न्यौपानेले धरान आर्चरी क्लबकी परिणा राईलाई सोझो सेटमा हराउँदै स्वर्ण जितिन् । तेस्रो स्थानको लागि भएको खेलमा धरानकै हेमलता राई विजयी भइन् । प्रतियोगितामा परिणा र हेमलताले क्रमशः रजत र काँस्य पाए । सोही इभेण्ट्सको स्टाडर्ड पुरुष एकलमा तनहुँ आर्चरी क्लबका दर्शन गुरुङ अब्बल निस्के । उनले फाइनलमा कास्की आर्चरी एशोसिएसनका तिलक पुनलाई पराजित गरी स्वर्ण जिते । तिलकले रजत पाए भने हिमालयन आर्चरी क्लबका अनिल भुजेलले काँस्यमा चित्त बुझाए ।
७० मिटरको खुला रिकभ पुरुष एकलमा ६४७ अंकका साथ बारा आर्चरी क्लबका गंगा कुँवर प्रथम, सोही क्लबका मीनबहादुर गुरुङ ६४४ अंकका साथ दोस्रो र हिमालयनका प्रेमप्रसाद पुन ६३७ अंकका साथ तेस्रो भए । अघिल्लो खेलमा मीनबहादुर गुरुङ ६३९ अंकका साथ प्रथम, गंगा कुँवर ६३८ साथ दोस्रो र बाँके आर्चरी क्लबका मुकेश तामाङ ६३६ अंकका साथ तेस्रो भएका थिए ।
सोही इभेण्ट्सको महिलातर्फ ५६४ अंकका साथ हिमालयनकी आयुष तामाङ प्रथम, ५६३ अंकका साथ सोही क्लबकी कृष्णमाया स्याङदेन दोस्रो र अन्नपूर्ण आर्चरी क्लब पोखराकी रेणु तामाङ ४९७ अंकका साथ तेस्रो भइन् । अघिल्लो खेलमा भने रेणुले ५२९ अंकका साथ प्रथम, ५२८ अंकका साथ कृष्णमाया दोस्रो र ५१५ अंकसहित आयुषा तेस्रो भएका थिए । उक्त खुला रिकभ पुरुष र महिला इभेण्ट्सको शुक्रबार हुने अर्कोमा खेलपछि ¥याङ्किङ राउण्डमा प्राप्त कूल अंकका आधारमा स्वर्ण, रजत र काँस्यको टुंगो लाग्ने आयोजकले जनाएको छ ।
पहिलो दिनको खेलमा बाराले ७० मिटर ओपन रिकर्भको टिम स्पर्धामा स्वर्ण जितेको थियो भने हिमालयन र बाँके आर्चरी क्लबले क्रमशः रजत र काँस्य जितेका थिए । शनिबार खुला र स्टाण्डर्ड इभेण्ट्स दुबैतर्फको मिक्स टिम तथा खुला एकल पुरुष र महिलातर्फको फाइनल हुने प्राविधिक संयोजक योगेन्द्र शेरचनले जानकारी दिए । प्रथम लुम्बिनी राष्ट्रिय च्याम्पियनसीपअन्तर्गत नेपाल आर्चरी संघको आयोजनामा बिहीबारदेखि प्रतियोगिता सुरु भएको हो । विभिन्न इभेण्ट्समा गरी विभिन्न ११ जिल्लाका ६५ जना खेलाडी सहभागी राष्ट्रियस्तरको यो प्रतियोगिता अवलोकन गर्न जाने दर्शकको संख्या भने न्यून छ ।