काठमाडौं । संस्कृति, पर्यटन तथा नागरिक उड्डयनमन्त्री भानुभक्त मन्त्री ढकालले असहज अवस्थामा स्वास्थ्य तथा जनसङ्ख्यामन्त्रीको आफ्नो पाँच महिने कार्यकाल सफल भएको बताएका छन् ।
संस्कृति मन्त्रालयअन्तर्गत नेपाल निजामती कर्मचारी सङ्गठनका प्रतिनिधिसँग आज भएको छलफलमा उनले विधि र पद्धतिभन्दा पनि अतिरिक्त स्वार्थका रुपमा लामो समयदेखि मन्त्रालय रुमलिएका अवस्थामा आफूले सुधारात्मक कार्य गरेको बताएका हुन् ।
मेसिनरी औजार खरीदमा कमिसनको चक्कर आदि कारणले स्वास्थ्य मन्त्रालयको खरीद प्रक्रियामा पनि विकृति बढेको उल्लेख गर्दै उनले आफूले शुुद्धीकरणको यात्रा आरम्भ गरेको बताए ।
मन्त्री ढाकालले मुलुक लकडाउनमा रहेका बेला सामग्री ढुवानी गर्न कठिनाइ भइरहेको परिस्थितिमा पनि आफ्नो पहल कदमीले कोभिड–१९ सँग सम्बन्धित औषधिजन्य सामग्री ल्याएर विकसित मुलुकको भन्दा सहजरुपमा व्यवस्थापन गरिएको जिकिर गरे । सङ्कटपूर्ण अवस्थामा स्वास्थ्य मन्त्रालयको नेतृत्व गर्दा पनि एकै पटक गाउँपालिकामा अस्पताल उद्घाटन गरेर स्वास्थ्य क्षेत्रमा क्रान्ति ल्याइएको उल्लेख गर्दै उनले शक्तिशाली मुलुकले समेत स्वास्थ्य सामग्री नपाएका सन्दर्भमा सरकारले सहजरुपमा सामग्री ल्याएर दायित्व पूरा गरेको बताए ।
सरकारले एक चिकित्सक एक स्वास्थ्य केन्द्र नमूना परियोजनाको शुरुआत गर्नका साथै मुलुकभरका गाउँपालिकामा पाँच, १० र १५ श्ययाका ३१५ अस्पताल गत मङ्सिर १५ गते एकै दिन उद्घाटन गरेको थियो ।