मंसिर २२,पोखरा /पोखराको रामघाट स्थित सेवा हस्पिटल एण्ड रिसर्च सेण्टर प्रालिसंगको सहयोग र सहकार्यमा सञ्चालिन नेश्नल एकेडेमी अफ स्पोर्टस् मेडिसिन, र क्षेत्रिय क्रिकेट विकास समितिबिच एक आपसको सेवा सुविधा आदन प्रदान गर्ने सम्बन्धमा सम्झौता भएको छ । मेडिसिनका अध्यक्ष डा.पदमबहादुर खड्का र समितिका महासचिव क्रषिराम गौतमले सम्झौता पत्रमा हस्ताक्षर गरे । सम्झौता अनुसार स्पोर्टस् मेडिसिनले यहाँका क्रिकेट खेलाडीहरुका लागि स्वास्थ्य उपचारमा विशेष सहयोग गर्नेछ भने समितिले पनि पोखरामा सञ्चालन हुने सम्पूर्ण प्रतिस्पर्धाहरुमा खेलाडीहरुको प्राथमिक उपचारमा सहुलियतको कार्ड उपलव्ध गराई सेवा हस्पिटलले उपचार गर्ने भएको छ ।
सम्झौता समारोहमा डा खड्काले नेपालमा खेलको विकास संगै खेलाडीको स्वास्थ्यमा पनि ध्यान दिइनुपर्नेमा जोड दिए । ‘कतिपय खेलाडीहरु खेल्न नमिल्ने अवस्थामा पनि खेलिरहेका छन, यस्तो अवस्थामा उनीहरुले नतिजा राम्रो दिन सक्दैनन् भने उनीहरुको खेल भविष्य झनै डरलाग्दो हुन सक्छ’– उनले भने ।
नेपाली खेलाडीहरुले खेल्नुपूर्व अन्जानमै प्रयोग गर्न नहुने औषधीको प्रयोग गर्दा डोपिङ्ग प्रकरणमा परेर मेडल गुमाउनु परेको बताउँदै अब भने यस्ता कुराहरुमा पनि चनाखो हुनुपर्ने उनले बताए । खेलाडीको शारिरीक तथा मांसपेशीको वनावट अनुसारनै कुन खेलमा योग्य हुन्छ भन्ने वारेमा समेत सल्लाह दिइने डा. खड्काले बताए । कास्की जिल्ला क्रिकेतट संघका सचिव सञ्जयकान्त सिग्देल, नेपाल खेलकुद पत्रकार मञ्च कास्कीका अध्यक्ष विनोद लामिछानेले पनि आफ्नों भनाई राखेका थिए ।