पोखरा, १६ माघ /बढ्दो बेरोजगारी न्यूनिकरण गर्ने उद्देश्यस्वरुप रोजगार कोष हेल्भेटास स्वीस ईन्टरकोअपरेशन नेपालले निशुल्क रोजगारी एवं उद्यमशिलता तालिम सन्चालन गर्दै आएको छ । संस्थाले बुधबार पोखरामा कार्यक्रम गरि सरोकारवाला सगँ छलफल समेत गरेको छ ।संस्थानले पोखरामा केहि समय पछि नै तालिम सन्चालन गर्ने बताएको छ । रोजगार कोषका टिम लिडर बलराम पौडेलले ‘पोखरामा तालिमका लागि तीन वटा ट्रेनिङ ईन्स्टिच्युटसंग सहकार्य भैसकेको जानकारी दिए । सन् २०१४ मा १२ हजार युवाहरुलाई स्वरोजगार बनाउने उद्देश्यसहित संस्थाले तालिम संचालनमा ल्याउन लागेको हो ।
अति विपन्न तथा विशेष अवस्था भएका युवाहरुका लागि कार्यक्रम लक्षित रहेको संस्थाले जानकारी दिएको छ । अपाङ्गता भएका, एचआईभी संक्रमित, सडक तथा अनाथ बालबालिका, हिंसामा परेका महिला, कैदी तथा पुर्व कैदीहरुलाई तालिममा विशेष ग्राह्यता दिईने उसले बताएको छ । ३ महिना प्राविधिक तालिम र एक महिना व्यवस्थापकिय तालिम गरि चार महिनासम्म दिईने तालिममा विशेषगरि वेल्डिङ, प्लम्बिङ, टेलरिङ जस्ता ७० भन्दा बढि विषय सिकाईन्छ । संस्थाले देशभरि ३९ वटा ईन्स्टिच्युटहरुसंग सहकार्य गरेर तालिम संचालन गर्दै आएको छ ।
रोजगार कोषले २०१३ सम्ममा ७० हजार भन्दा बढि युवाहरुलाई तालिम दिएर स्वरोजगार बन्न सघाएको दाबी गरेको छ । सन् २००७ मा स्थापना भएको संस्थाले तालिम दिएका युवाहरुमध्ये ७० प्रतिशतभन्दा बढि तालिम लिएर विदेशिएका छन् भने ३० प्रतिशत नेपालमै बसेर विभिन्न उद्यमशिलतामा लागेका छन् ।
‘युवाहरुलाई उद्यमशिल बनाउन प्रेरित गर्ने संस्थाको उद्देश्य निकै प्रशंसनीय भएको पोखरा उद्योग वाणिज्य संघका अध्यक्ष संजीवबहादुर कोईरालाले बताए । संस्थाले रोजगारी र उद्यमशिलताको बारेमा युवाहरुलाई जानकारी दिने उद्देश्यले पोखरा सन्चलान भैरहेको राष्ट्रिय औद्योगिक व्यापार मेलामा १० वटा स्टल समेत राखेको छ । उसले मेला अवलोकन गर्न आउनेहरुलाई उद्यमशिलता र रोजगारीको बारेमा जानकारी गराउँदै आएको छ ।