पोखरा, १० माघ । पोखराको नयाँबजारस्थित प्रदर्शनी केन्द्रमा जारी राष्ट्रिय औद्योगिक ब्यापार मेला–२०७० को दोश्रो दिन शुक्रबार ६ हजार दर्शकले मेलाको अवलोकन गरेका छन् । मेलामा १ करोड ८५ लाखको आर्थिक कारोवार समेत भएको आयोजक संस्था पोखरा उद्योग बाणिज्य संघका महासचिव नारायण कोइरालाले जानकारी दिए । मेलामा राखिएका अटोका स्टलबाट गाडीहरु बिक्री भएपछि कारोवार बढेको हो । मेलामा शनिबारबाट दर्शकको चाप बढ्ने उनले अनुमान लगाए ।
यता मेला अन्तर्गत भएको विद्यालयस्तरीय सामूहिक नृत्य प्रतियोगितामा सरस्वती उच्च मावि र कंचनजंघा बोर्डिङ स्कूल फाइनलमा अघिल्लो चरणमा प्रवेश गरेका छन् । शनिबार फेवा पब्लिक स्कूल, नोभेल एकेडेमी, सूर्योदय बोर्डिङ स्कूल र गुरुकूल विद्याश्रमबीच प्रतिष्पर्धा हुने साँस्कृतिक उपसमिति संयोजक दामु अधिकारीले जानकारी दिए । शनिबार धादिङ र लमजुङ उद्योग बाणिज्य संघबीच लोक दोहोरी गीत प्रतियोगिता हुनेछ ।
यसैगरी शबिार लोकदोहोरी कलाकारहरु प्रजापति पराजुली, राजु गुरुङ, कृष्ण देवकोटा, बद्रि पराजुली,निशा पोखरेल रामजी पौडेल, सीता केसी, टेक क्षेत्री लगायतका कलाकारहरुले पनि मेलामा सहभागीहरुलाई मनोरञ्जन दिलाउने छन् । युवराज भण्डारी र राजेन्द्र नेपालीको हाँस्य जोडी पनि शनिबारको आकर्षण हुने छन् । शनिबार पप गायक धिरज राई, कौसल्या गुरुङसहित मोर्डन डान्स पनि समावेश गरिएको छ । लगानीको सम्वद्र्धन, उद्योग ब्यवसायको प्रवद्र्धन भन्ने नारासहित आयोजित मेलामा खाद्य, दैनिक उपभोग्य बस्तु, लत्ताकपडा,अटो, पुष्प, लगातका २ सय ७० वटा स्टल रहेका छन् । मेला माघ २० गतेसम्म चल्नेछ ।