पोखरा, ९ माघ ः नेपाल प्रेस युनियन कास्कीको वृहत भेला तथा बनभोज कार्यक्रम बिहीबार पामेमा सम्पन्न भएको छ । युनियनमा आबद्ध क्रियाशील पत्रकार, अक्षयकोषका चन्दादाता शुभेच्छुकहरुसमेत गरी एक सय भन्दा बढीको सहभागितामा भेला सम्पन्न भएको हो । क्रियाशील पत्रकारहरुबीच लामो समयदेखि सामूहिक भेटघाट र नयाँ र पुराना पत्रकारबीच परिचय नै नभएको अवस्थामा भेला तथा बनभोज निकै फलदायी भएको युनियनले दाबी गरेको छ । भेलामा युनियनको आसन्न जिल्ला तथा केन्द्रिय अधिवेशन र नेपाल पत्रकार महासंघको आसन्न जिल्ला निर्वाचनका बारेमा छलफल भएको युनियनका अध्यक्ष शिरोमणि बरालले बताए । भेलामा युनियनमा आबद्ध पत्रकारहरु दुवै चुनावमा एकताका साथ अघि बढ्ने सहमति भएको छ । उद्धेश्य अनुसार भेला तथा बनभोज निकै फलदायी भएको दाबी गरे । युनियनको अक्षयकोषको लोकतन्त्रमा विश्वास राख्ने महानुभावसंग सहयोगको अपेक्षा गर्दै युनियन सम्बद्ध पत्रकारहरु एकढिक्का भएर अघि बढ्ने प्रतिबद्धता जनाए ।
सो अवसरमा युनियनले स्थापना गर्न लागेको अक्षयकोषको लागि विभिन्न ब्यक्तिहरुले सहयोग प्रदान गरेका थिए । नेपाली काँग्रेसका पूर्व जिल्ला सभापति शोभियतबहादुर अधिकारी आफ्ना स्वर्गीय मातापिताको स्मृतिमा २५ हजार पाँच सय २५ रुपैयाँ, नेपाली काँग्रेस पोखरा उपमहानगर पालिका १८ का वडा इकाई सभापति बोधराज कार्कीले २५ हजार छ सय ७५ रुपैयाँ युनियन कास्कीका अध्यक्ष बराललाई हस्तान्तरण गरेका थिए । यसैगरी नेपाल पत्रकार महासंघ कास्कीका कोषाध्यक्ष डोलराज पोखरेल र प्रेस युनियन कास्कीका सदस्य कमल पराजुलीले जनही ११ हजार एक सय ११ रुपैयाँ प्रदान गरेका थिए ।
अक्षयकोषबाट प्रेस युनियन पत्रकारिता पुरस्कार तथा कल्याणकोष संचालन गर्ने तयारीमा युनियन जुटेको छ । कोषमा हालसम्म करिब नौ लाख रुपैयाँ जम्मा भएको छ । भेलामा, प्रेस युनियनका केन्द्रिय बरिष्ठ उपाध्यक्ष गंगाधार पराजुली, कास्की काँग्रेसका पूर्व सभापति शोभियतबहादुर अधिकारी, वर्तमान सचिव कृष्ण केसी, सहसचिव मुकुन्द बास्तोला ‘ज्वाला’, जिल्ला सदस्य देवेन्द्र शेरचन, नेपाल ट्रेड युनियन काँग्रेसका पश्चिमाञ्चल संयोजक मुरारी शर्मा, डीएलए कास्कीका अध्यक्ष रोहितराज बास्तोलालगायतले युनियनले अक्षयकोष स्थापनाको लागि चालेको कदमले सफलता पाएको भन्दै प्रशंसा गरेका थिए । उनीहरुले युनियनले गर्ने हरेक कार्यक्रममा सहयोग गर्ने प्रतिबद्धता ब्यक्त गरेका थिए । उनीहरुले आगामि दिनमा युनियन एक ढिक्का भएर संगठन निर्मााणमा जुट्न आग्रह गरेका थिए ।
कार्यक्रममा नेपाल पत्रकार महासंघ कास्कीका पूर्व अध्यक्ष रविन्द्र बास्तोला, नेपाल पत्रकार महासंघ कास्कीका उपाध्यक्ष राजबहादुर गुरुङ, युनियनका पश्चिमाञ्चल संयोजक रमेश पौडेल, पूर्व जिल्ला अध्यक्ष हेमराज बराल, साफ्ना नेपालका पश्चिमाञ्चल संयोजक ईश्वरी न्यौपाने, भेला तथा बनभोजका संयोजक एवं गण्डकी अञ्चल सचिव टंक अधिकारी, ट्रेड युनियन कास्कीका सचिव केशव भट्टराईलगायतले बोलेका थिए । कार्यक्रममा सहभागी पत्रकार तथा सुभेच्छुकहरुले आफ्नो परिचयका साथै युनियनको संगठन सुदृढिकरण र ब्यवसायिक पत्रकारिताको बारेमा धारणा राखेका थिए । युनियनका उपाध्यक्ष यदुनाथ बञ्जाराले स्वागत गरेको कार्यक्रमको संचालन सचिव माधव रेग्मीले गरेका थिए ।