गोकुल बानियाँ/पोखरा ३० मंसिर । पोखरा उपमहानगरपालिकाले घरभित्रको फोहोर ब्यबस्थापन नगर्ने पर्यटकिय क्षेत्र बैदामका ८० ओटा घरलाई ७ दिने अल्टिमेटम सहित कारबाहीको चेतावनी दिएको छ । पर्यटकिय क्षेत्र लेकसाईडका घर, होटल र रेष्टुरेण्टलाई आज पत्र थमाएर एक सतामा फोहोर मैला ब्यबस्थापन नगरे जरिवाना तिराउने चेतावनी दिईएको हो । पर्यटकिय आकर्षणको केन्द्र फेवातालमा ढल मिसाउने र फोहोरपानीको ब्यबस्थापन नगर्ने घरहरुलाई सचेत गराईएको उप–महानगरपालिकाले जनाएको छ ।
पोखरा उप–महानगरपालिका सहित सामुदायिक सेवा केन्द्र बैंदाम, फेवा बाताबरण सुधार समिति र टोल बिकास संस्था वडा समन्वय समिति बैदामको संयुक्त अनुगमन टोलिले तालमा ढल मिसाउने घरघरमा पुगी पत्र थमाएका छन् । ‘ सम्बन्धित क्षेत्रमा गई अनुगमन गर्दा घर, होटल, रेष्टुरेण्टमा फोहोर पानी फेवा नहर वा बर्षात्को ढलमा मिसाएको देखियो , नगरपालिकाको तर्फबाट दिईएको पत्रमा लेखिएको छ– सोफिट बनाई फोहोर पानीको ब्यबस्थापन गर्न सात दिनको समय दिईएको छ । ’
पुन अनुगमनको क्रममा फोहोर ब्यबस्थापनको काम गरेको नपाए कानुन अनुसार जरिवाना र अटेर गर्नेको पत्रिकामा नाम प्रकाशित गरिने उपमहा नगरपालिकाले जनाएको छ । केहि दिन अघि बैदाम क्षेत्रमा गरिएको अनुगमनको क्रममा तालमा ढल मिसाएको र जथाभाबि फोहोर फालेको देखेपछि परिणममुखी काम सुरु गरिएको सामुदायिक सेवा केन्द्र बैदामकी अध्यक्ष पम्फा पहारीले बताईन् ।
लेकसाईडका घर, होटल र रेष्टुरेण्टले ढल मिसाएकाले तालको पानी दिनहु प्रदुशित हुदै गएको छ । यसअघि पटक पटक आग्रह गर्दापनि अटेर गरेपछि चेतावनी सहितको पत्र थम्याएको नगरपालिकाका सुरक्षा प्रमुख बसन्त चालिसेले बताए । दैनिक नुहाईधुवाईको क्रममा निस्कने फोहोर पानीको ब्यबस्थापन देखि शौचालयबाट निस्कने ढलको ब्यबस्थापनको लागि दिईएको समयसिमा कटेपछि पुन अनुगमन गरिने उनले बताएका छन् ।