काठमाडौं, २६ पुस ।पूर्वराजा ज्ञानेन्द्र शाहले चार वर्ण छत्तीस जातको साझा फूलबारीको रुपमा रहेको मुलुकलाई बिथोल्ने प्रयास भएको भन्दै चिन्ता व्यक्त गरेका छन् । २९५ औं पृथ्वी जयन्तीका उपलक्ष्यमा शुभकामना व्यक्त गर्ने क्रममा मंगलबार वक्तव्य जारी गर्दै उनले शान्तिप्रिय जनताबीचको एकता बिथोल्ने, देशको सार्वभौम सत्ता कमजोर पार्ने, राज्य संयन्त्रहरूलाई दूर्वल तुल्याउने, भौगोलिक एवं क्षेत्रीय अखन्डता माथि प्रहार गरी अपराध गर्ने काम भएको समेत बताएका छन् ।
वक्तव्यमा पृथ्वीनारायण शाहको संघर्ष, नेतृत्व कौशल, दूरदर्शिता नेपाली जनताको सामूहिक साथ र सेनाको वीरताको परिणमस्वरुप हामी नेपालीलाई प्राप्त यो देशको राष्ट्रियता, राष्ट्रिय एकता र सामाजिक सद्भाव संकटमा पर्नु हामी सबै देशभक्त नेपालीका लागि गम्भीर चिन्ताको विषय बनेको उल्लेख गरिएको छ ।पूर्वराजा शाहले नेपाली जनताको इच्छा अनुसार नारायणहिटी दरबारबाट बाहिरिएपनि एक दशक बित्दा नेपाल बच्ने हो कि होइन भन्ने चिन्ता जनक घडीमा रहेको भन्दै देशलाई कसैको क्रिडास्थल बन्न नदिन ऐक्यबद्ध हुन समेत आह्वान गरेका छन् ।
नेपाली भनेका जहाँ बसे पनि नेपाली नै हुने भन्दै देशमा संकट परेका बेलामा कसरी एकताबद्ध हुने भनी उदाहरण प्रस्तुत् गर्न समेत उनले आह्वान गरेका छन् । पूर्वराजा शाहले राष्ट्रनिर्माता पृथ्वीनारायण शाहको वंशजका एक नेपाली हुनूका नाताले नेपालको अस्तित्व, स्वाभिमान र गौरव चीर कालसम्म जोगाउन, नेपाली बीचको एकतालाई जीवन्त र स्थायी बनाउन, स्थीर, शान्त र समृद्ध नेपाल निर्माण गर्न सबै नेपालीलाई राष्ट्रिय झन्डामुनि गोलबद्ध हुन समेत आह्वान गरेका छन् । उनले वक्तव्यमा आफू राजदरबारबाट बाहिरिए पनि जनता र राष्ट्रप्रतिको जिम्मेवारीबाट पन्छिएको महसुस नगरेको भन्दै अहिलेको गैरजिम्मेवार सत्ता प्रति कटाक्ष तथा सचेत समेत गरेका छन् ।
पृथ्वीनारायणको सम्झनामा पूर्वराजाले जारी गरेको वक्तव्यको पूर्णपाठ
श्री ५ वडामहाराजाधिराज पृथ्वीनारायण शाहको संघर्ष, नेतृत्व कौशल, दुरदर्शिता नेपाली जनताको सामुहिक साथ र सेनाको वीरताको परिणामस्वरुप हामी नेपालीलाई प्राप्त यो देशको राष्ट्रियता, राष्ट्रिय एकता र सामाजिक सद्भाव संकटमा पर्नु हामी सबै देशभक्त नेपालीका लागि गंभिर चिन्ताको विषय बनेको छ ।
चारवर्ण छत्तीस जातको साझा फुलवारीको रूपमा रहेको यस मुलुकका शान्तिपि्रय जनताबीचको एकता विथोल्ने, देशको सार्वभौमसत्ता कमजोर पार्ने, राज्य संयन्त्रहरूलाई दुर्वल तुल्याउने, भौगोलिक एवं क्षेत्रीय अखण्डतामाथि प्रहार गर्ने कार्यमा जो जसले विषारोपण गरेको भए तापनि तिनले नेपाल र नेपाली विरुद्ध अक्षम्य अपराध गरेका छन् ।यसै गरी भाषा, धर्म, संस्कृति र राष्ट्रिय पहिचानका आधारहरू भत्काउने प्रयास समेत भइरहेको छ ।
स्मरणीय छ, नेपाली जनताको इच्छा नै राजइच्छा हुने परम्परा रही आएको यस मुलुकमा तत्कालिक परिस्थिति समेतलाई दृष्टिगत गरी हामी नारायणहिटी राजदरवारबाट बाहिरिएका हौं तर जनता र राष्ट्रप्रतिको जिम्मेवारीबाट पन्छिएको महसुस हामीले कहिल्यै गरेका छैनौं र गर्ने पनि छैनौं ।
दशक नवित्तै नेपाल बन्ने होइन, बच्ने हो कि होइन भन्ने चिन्ताजनक घडीमा आज हामी आइपुगेका छौं । देश कसैको क्रीडास्थल होइन, हुन सक्दैन र हुन दिइनु पनि हुँदैन भन्ने सोचकासाथ देशभक्त नेपालीहरूले एकतावद्ध भई सद्भाव, देशभक्ति र आपसी एकता तथा प्रेमको डोरीले मात्र नेपालको अस्तित्व र पहिचान जोगाउन सक्दछ भन्ने हाम्रो धारणा रही आएको छ ।
नेपाली भनेका जो जहाँ रहे बसे पनि नेपाली नै हुन् । देशमाथि संकट आइपर्दा कसरी एकतावद्ध हुन्छन् भन्ने हामीले उदाहरण बन्नु परेको छ । विश्व समुदाय, समृद्धि प्राप्तिको निमित्त प्रतिस्पर्धा गरिरहँदा हामी भने थप विपन्नतातर्फ अग्रसर हुँदैछौं ।
विश्वमा राष्ट्रवादी भावनाको जागरण आउँदै गरेको वर्तमान सन्दर्भमा हामी भने राष्ट्रको अस्तित्वमाथि नै आँच पुग्ने व्यवहार प्रस्तुत गर्दैछौं । यस्तो दुःखद र विडम्वनापूर्ण अवस्थाको अन्त्य हुनै पर्दछ ।
राष्ट्रनिर्माता पृथ्वीनारायण शाहको वंशजका एक नेपाली हुनुका नाताले नेपालको अस्तित्व, स्वाभिमान र गौरव चिरकालसम्म जोगाउन, नेपालीबीचको एकतालाई जीवन्त र स्थायी बनाउन, स्थिर, शान्त र समृद्ध नेपाल निर्माण गर्न सबै नेपालीलाई राष्ट्रिय झण्डा मुनि गोलवद्ध हुन आह्वान गर्दछु ।
श्री पशुपतिनाथले हामी सबैको कल्याण गरुन् ।
जय नेपाल ।